TONGƆ NDA YEZU

(Genèse 1, 1-5.26-27; 2,1-4a.7.15-25)

1 ¹Uzu ti a ye zu ko Nzapa lindo yayu na tisɛ. ²Kanda sɛsɛ ndo waawa gɛgɛrɛ. Tɔrɔ tɛ Nzapa ndo fana ndo ka ya mbingo ndo ngu mabere ya mɛ ndo ya. ³Nzapa tɛnɛ ya: „ndo avuru“. Ko, ndo avuru. ⁴Nzapa hû ya vurungɔ ndo adu nzõni. La Nzapa akangbi vurungo ndo na mbingo. ⁵Nzapa aili vurungo ndo ya „la“; aili mbingo ya „bi“. Bi vu, ndã ade. Ati bi kwa kɔi…

²⁶Nzapa tɛnɛ ya: „Eli zo na ngi lɛ e, nga ma e, ko ala ndo le gbia ndo asusu ti gbɛ ngu, aù ti lɛ ndozu, na atolɛ, asa ti ngɔngɔ, na akukuye mɛ ndo hara ka lɛ sese“. ²⁷Nzapa ali zo na ngi lɛ lo, na ngi lɛ lo la lo lekɛ zo, lo lɛkɛ lo, kɔli na wali.

2 ¹Ba seni mɛ ndo alɛkɛ na yayu na tise, na linɔ tɛ aye zu lako. ²Nzapa kɔ ndo nda ye mɛ lo li na bi ti mbarambara, ko na bi ti mbarambara ko lo wɛ ndo tɛrɛ lo, na lo ti aye zu mɛ ndo lo li. ³Nzapa asunu bi ti mbarambara, ko li ni santo, na lo mɛ ya lo wɛ ndo tɛrɛ lo na pɛko aye zu mɛ ndo lo li.

^4aBa seni mɛ ndo Nzapa ali na yayu na tise ngoi mɛ ndo ali na ni la.

Nzapa tara lebɛ zo ka Paradizo

⁷Seni la, Nzapa Yawe alɛkɛ ngbilondo na sese ti kpondo, ko lo ulu mbo ka ya hõ lo, la ngbilondo ati zo abanda wɛngɔ mbo...

¹⁵ Nzapa Yawe amu zo akpã lo ka yaka ti Eden ya lo lu yaka ko lo bata nga yaka. ¹⁶Ko Nzapa Yawe alu ndia olo hê zo : « Mɔ lengbi ti tɛngɔ alekɛkɛ zu ti Yaka. ¹⁷Kanda ta mɔ tɛ lekɛkɛ ti hîngangɔ nzõ liye na siɔ liye ma. Na lo mɛ ya, la mɛ gbanda mɔ tɛ lekɛkɛ ni ko, mɔ ti gbanda wa kpingɔ kwá. »

¹⁸Nzapa Yawe apa ya : « Ta du nzõni ya zo adu kɔi na bɛlo ma. Alengbi ya mbi lɛkɛ hê lo wa zangɔ lo mɛ alengbi na lo. »

²¹Ala Nzapa Yawe ato kota langɔ ka ndo zo kɔli, la lo la langɔ. Lomu le ngara lo kɔi, ko lo vî lɛ kã ni ka katɛ lo. ²²So pɛkoni lo lɛkɛ zo wali na ngara zo kɔli ni, la lo ga na lo hê zo kɔli.

²³Ala zo kɔli adɛ kɔngɔ ya : « Olo mɛ ko, lo du bio ti bio tɛrɛ mbi nvɛni, lo nga mi ti mi tɛrɛ mbi nvɛni ! Aili gbanda lo la ‘wali’, na lo mɛ ya ahã ndo lo ka katɛ  koli !»

²⁴Ndani mɛ kɔli ndo zia to lo na ta lo, so lakatangɔ na tɛrɛ yalo, ko ala ndo ti bo mi tɛrɛ zo kɔi la.

²⁵Kanda ala zu ose ndo tɛrɛ la ndumbu, ko ta kamɛnɛ tɛ zo na fõ lo lɛ ala ma.

3¹Ngbɔ du ndo siɔ sa mɛ ɔ asiɔ sa ti yaka mɛ Nzapa Yawe ali zu va. Lo pa hê wali ya : « Nzapa tɛnɛ ya : ‘Ta î tɛ alekɛkɛ ti yaka zu ma’? » ²Wali adiri apa hê ngbɔ ya : « Elengbi ti tɛngɔ alekɛkɛ ti yaka. ³Kanda lo ti lekɛkɛ ko la bɛ yaka ko, Nzapa nê ya : ‘Ta î tɛ ni ma. Ta î pɔtɔ tɛrɛ ni ma, so ma î na kpilingɔ’.» ⁴Ngbɔ adiri nê hê wali ya : « Ipɔ! Ta î na kpingɔ ma! ⁵Kanda Nzapa hînga ya lako îna tɛngɔ ni ko, lɛ î nazingɔ ko îna tingɔ mabele a nzapa, mɛ ndo hînga nzõ liye na siɔ liye. » ⁶Wali hû ya kɛkɛ ni du nzõni ti tɛngɔ, ni du nga nzõni ti bangɔni, ko ni du nga nzõni ya zo tɛ ko zo alua kodɛ ti hîngangɔ yezu. Lo mu lekɛkɛ ni lo tɛ. Lo hê nga Tãngani hê koli mɛ ndo so tõnda lo, la lo tɛ. ⁷Na pɛkoni, lɛ la zu sɛ zi yango, ko ala hînga ya ani ndumbu.

Credo

Na ili Bwa na Nyi na Tɔrɔ Santo. Amɛn. +

Mbi ye ló tɛ Nzapa mɛ ngengereni kɔi,

Bwa mɛ kpengbani bɛ,

Wa lingo yayu na tise,

Na aye zu mɛ e ndohû,

Nga na omɛ ta e ndohû na lɛ e ma.

Mbi ye ló tɛ Yezo Kristo mɛ Gbia bo lo kɔi,

Ngbongi Nyi Nzapa.

Bwa pia ndo adû lo uzu ti ngoi kwɛ.

Lo Nzapa mɛ ‘lo ka tɛ Nzapa.

Lo bɛta vuru ndo, lo bɛta Nzapa,

Adû lo, ta ‘li lo lingɔ ma,

Du tɛ lo na tɛ Nzapa Bwa kwɛ kɔi,

Ye zu si ndo na lo tɛ lo.

Lo ló ndo ka ndozu,

Lo zu ge tise so sarangɔ e azi,

Lo mu ndo tɛrɛ zo ka ya Mɔsia Maria,

Na lo nguru tɛ Tɔrɔ Santo.

Lo ti bɛrɛ zo.

Lo hû ndo Peno lo tɛ e ngoi tɛ Ponsio Pilato :

Agbala ndo lo ndo krusi, Akpi, ahɔ lo.

Lo so na bi ti ota,

Se ko ndo asu ni ka ya Buku Santo.

Lo ma ka Yayu,

Lo du ndo koti ti Nzapa Bwa.

Lo ti diri gbanda ga na ndima,

So fangɔ ngbanga tɛ azi mɛ lɛ la ngê,

Na tɛ ‘la mɛ akpili wɛ.

Ta ma lengɔ gbia tɛ lo da ma.

Mbi ye lo tɛ Tɔrɔ Santo mɛ Gbia,

Wa hêngɔ e du tɛ aya Nzapa.

Lo ló ka tɛ Nzapa Bwa na Nyi.

Andovɔrɔ lo, Angonda nga lo kwɛ kɔi

Na Nzapa Bwa na Nyi,

Lo tɛnɛ ndo tɛnɛ na nyõ Aprofɛta.

Mbi ye lo tɛ Eklezia mɛ ngengereni kɔi,

Santo, Katoliko, alengbi na li ndo kwɛ,

Alo ka tɛ Apostolo.

Mbi ye lo ti Batisimɔ mɛ ngengereni kɔi,

Mɛ ndokpo siɔ ye,

Mbi ndo lɛndɛrɛ Kwá mɛ gbanda e so,

Nga na Kaka mɛ gbanda e ngbã.

Amɛn.

Pater Noster

Bwa mɛ ka yayu,

A ndo gonda bɛ ili mɔ,

Du Gbia tɛ e

A ndo li bɛ ye ge tise na se nyomɔ,

Ma se mɛ ka yayu ke,

Nhê e la olo mɛ, tɛ tɛ e mɛ e tɛ la kwɛ,

Ondɛ siɔ ye tɛ e 

Semɛ e ndo ɔndɛ siɔ ye tɛ a fô e

Ta mɔ zia e ti na wangɔ ma

Wa sara e na ya siɔ lo.

Amɛn.

Ave Maria

Maria zegbia,

Grasia nsî bɛmɔ

Gbia ndo separa mɔ

Mɔ ɔ awe zu

Nzõ ye ti na Yezo ko la ngɔ ni ya mɔ

Santo Maria, Ta Nzapa,

Sambela nhê e a siɔ zi

Ndɛ na ngoi mɛ gbanda e kpi ni

Amɛn.

Magnificat

Zo wali mɛ ma ndozu ma sara la,

Adê ma nzê, ndo sû ma la, akpengba ma lino tɛ alombe ka lɛ to, zo wali ni ko nɛ na? (Ct 6,10)

+ Tɔrɔ tɛrɛ mbi aya Gbia tɛ mbi.

Bɛ mbi ndosaba so Nzapa mɛ wa sara mbi.

+ Ada bɛ lo na mbumbuse zo tɛrɛ mbi mɛ wa kwa tɛ lo,

Wa azi zu agonda mbi gbanda ya Bɛ mbi de.

+ So Nzapa mɛ lo kpengbani bɛ, ali akukuna ye tɛrɛ mbi,

Ili lo nzõni bwai. Bɛ lo ndo azi mɛ ndo tɔndɔ lo ngbî.

+ Ti lo kpengbani,anwɔnwɔ ya awa yakɛ.

Ahã Gbia mɛ ka tɛrɛ la azi, aya awa ngarangɔ tɛrɛ la.

+ Akaye hê ambumbuse zi ndoni ndoni, ayuru awa togwa,

Ati diri gwe yamba ti la nyomɔ nyomɔ.

+ Vundu tɛ Aisrael mɛ ava lo agbõ lo ndo, la lo sara la.

Se mɛ lo pia ko kapa uzu, hê ato e Abraham na atara lo la.

+ E ye ya : andovɔrɔ Bwa, na Nyi, na Tɔrɔ Santo.

Se kondo andovɔrɔ na la uzu, na ndɛ, na lakwɛ,

ta ngoi mɛ azia ni da ma. Amɛn.

NZƆPA TƐ YEZO MƐ YOANƐ ASU

Yezo lo Tɛnɛ tɛ Nzapa

1 Uzu ti Nzapa lingɔ ye zu, Tɛnɛ ndo da gã, Tɛnɛ na Nzapa ndodu ndo ndoni koi. Tɛnɛ ndo Nzapa. ²Uzu ti tongɔ nda ye zu ko, Tɛnɛ na Nzapa ndodu ndo ndoni koi. ³Nzapa ali ndo aye zu na lege ti Tɛnɛ, ko ye mɛ ta Nzapa ali na lege ti Tɛnɛ ma ko, ta ye ni da ma. ⁴Tɛnɛ ni ko la ndohê bɛta du hê azi, ko bɛta du ni adu nga ma lá mɛ ndovuru na ndo hê azi. ⁵Ndo ni avuru ngbê na ya mbingo, ko ta mbingo avî ni ma.

6 Nzapa ato ndo wa pango kwa tɛ lo mɛ ili lo la Yoanɛ. ⁷Yoanɛ aga ndo so kambisangɔ nda lo tɛ wa vurungɔ na ndo. Lo ga ndo so pangɔ lo tɛ wa vurungɔ na ndo hê azi zu, wadila a la ye lo tɛ wa vuruungɔ na ndo ni. ⁸Ta Yoanɛ nvɛni ndo la wa vurungɔ na ndo ma, kanda lo tɛ lo ndo zo mɛ aga so kambisangɔ nda lo tɛ wa vurungɔ na ndo. ⁹Wa vurungo na ndo mɛ ndo aga ge le sese, avuru na ndo hê azi zu ko, bo lo kɔi la bɛta wa vurungɔ na ndo.

10 Tɛnɛ aga ndo ge lɛ sese. Nzapa ali ndo sese na lege ti Tɛnɛ, kanda ta azi ti lɛ sese ahînga ndo Tɛnɛ ma. ¹¹Tɛnɛ aga ndo ka tɛ azi tɛ lo nvɛni, ko ta azi tɛ lo ayamba ndo lo ma. ¹²Kanda ambanga ayamba ndo lo, aye nga ndo lo tɛ lo, la lo hê la nguru ya, ala ti aya Nzapa. ¹³Ta a la ti aya Nzapa nga ma se mɛ azi ndodu na ngwê wali, wa ala dú nyi ma. Kanda Nzapa nvɛni la To la.

14 Tɛnɛ ni amu ndo tɛrɛ zo, lo ndodu ndo so popo tɛ e. Lo na nzõ bɛ ma wo ma, ko lo fa nga e na bɛta lo tɛ Nzapa zu. E hû ndo ndima tɛ lo mɛ ndo To lo Nzapa ahê lo, na lo mɛ ya, lo ngbongi Nyi. ¹⁵Yoanɛ apa ndo lo tɛ lo na kɔngɔ ya : « Lo ndo la mbi ndopa lo tɛ lo ya, lo na gangɔ pɛko mbi, kanda lo ɔ mbi na nguru, ta sanga ma, lo ndo uzu da gã na ngoi mɛ ta adɛ adú mbi ma. »

16 Lo li ndo nzõ bɛ hê e zu, lo sunu ndo nga e ndoni ndoni. ¹⁷Nzapa alu ndo ndia hê e ti ndo Mɔizɛ, kanda e lua nzõ bɛ tɛ lo, na bɛta lo tɛ lo ti ndo Nyi lo Yezo Kristo. ¹⁸Ta zo kɔi ahû Nzapa ma. Kanda ngbongi Nyi lo mɛ lo nvɛni nga Nzapa, lo ndodu ka tɛ To lo Nzapa, la afa e na To lo Nzapa.